พระแสงดาบหลูบคำ ในพลตรีเจ้าแก้วนวรัฐ 
เจ้าหลวงเชียงใหม่ องค์ที่ 9
วิลักษณ์ ศรีป่าซาง/เรื่อง และบางภาพ
ดนัย ศิริกาญจนากุล/ดูแลตัวอักษร

เดือน 10 แรมค่ำ พร่ำว่าได้วัน 5 ไทร้วงเหม้า จุลสักราชได้ 1380 ตัว ปีเปิกเส็ด

ไหว้สาคำนบฅบยำ ถวายพระบาทเจ้า ม่อนข้าเจ้า ขอถวายการรับต้อน พระแสงดาบหลูบคำ ในพลตรีเจ้าแก้วนวรัฐ เจ้าหลวงเชียงใหม่ องค์ที่ 9

สระเด็จมาสู่ เพื่อมวลหมู่ข้าเจ้าทั้งหลาย หมายมีเฮือนเจียงลือ เป็นเค้า เวียงกุมกามมังราย สารภีหอมไกล๋ ท่าท้างเวียงชัย เชียงใหม่แก้วระมิงค์เมือง

ม่อนข้าเจ้า ขอน้อมถวายด้วยใจหมั้น นับเป็นวันบุญใหญ่ ด้วยหทัยผ่องแผ้ว ตนมิตรแก้วสุรเดช ลิ้มพานิช ผู้พิทักษ์รักษาพระแสงดาบฯ ได้ทราบข่าวยินดี มีเมตตาปลงปัน หื้อมาเป็นขวัญงานใหญ่ จักได้สถิตสำราญ ณ คุ้มหลวงพิมานกลางเวียงหมั่น นับแต่แรกวันถวายเครื่องแกล้มเลี้ยง ที่ 7 กรกฎาคม 2561 เวลา 16.00 น. จนเถิงเติงเพลาเที่ยง วันที่ 7 สิงหาคม ปีเดียวกัน แล

"วันสระเด็จมาด้วยพาหน แดดภายบนค้างฟ้า ครั้นวันทาสาไหว้เสร็จ สุริยะสระเด็จหับแสง พิรุณเทพบุตรแปลงฝนอ่อย ปรอยน้ำทิพย์มนต์โลก ดับทุกข์โศกใจไหม้ หื้อไพร่ฟ้าม่วนงัน ม่อนข้าสรรคำอ่อน ผายคำวอนจากใจ น้อมเอาไหมแดงมัด เป็นคำสัตย์ผูกขวัญ เพื่อป้องกันอาเพศเ หตุด้วยพระแสงแรงฤทธิ์ หวั่นถูกพิษอาคม จึ่งประหนมเอาด้ายแดง เส้นน้อยแฝงลูบคม ข่มเข่นฆ่าตัดขาด หมายมาดไว้เป็นโลหิต ดับพิษร้อนเริงแรง หากพระแสงแรงหมาย ผายฝักชักเข้าออก บอกได้กินเลือดแล้ว จักคลาดแคล้วพาลภัย เป็นมังคละใสบ่เส้า สิริโชคอยู่ใฝ่เฝ้า ผ่องแผ้ว พูนเขษม เจ้าเฮย.

พระแสงดาบงามนี้ ทั้งองค์ยาว 42 นิ้ว เฉพาะใบ 24 นิ้ว ด้ามงาม 17 นิ้ว ลงพระนามย่อ อกน. (อิ่นแก้วนวรัฐ) พระนามเดิมแห่งเจ้าหลวงองค์ที่ 9 สถิตเหย้าเจียงลือได้สักน่อย จึงคละคล้อยไปสู่ ณ ที่อยู่ยังคุ้มหลวงกลางเวียง หั้นแล.